Grøna skiftið: Longur vit bíða dýrari verður tað

Við hesi staðfesting spyr tingmaðurin og formaður Sambandsfloksins løgmann, um og nær hann ætlar at geva loyvi til stóru vindorkuætlanina Eysturlund í Eysturoynni. - Longur vit bíða, dýrari verður tað fyri samfelagið og umhvørvið sigur Bárður á Steig Nielsen m.a.  í viðmerkingunum til spurningin, sum Aksel Johannesen, løgmaður fer at svara í morgin. 

Umrødda vindmylnulund var eisini eitt  av málunum, sum fekk nógva umrøðu á stóru orkuráðstevnuni í Vágum nú um dagarnar, ein útbygging, sum stigtakararnir siga fer at minka munandi um oljunýtsluna og harvið útlátið í Føroyum.

Nú er málið so eisini reist á tingi. Formaður Sambandsfloksins og fyrrverandi løgmaður, Bárður á Steig Nielsen spyr í skrivligum fyrispurningi,  Aksel V. Johannesen, løgmann, um hann ætlar at geva loyvi til Eysturlund og nær roknast kann við, at loyvi verður givið.

Í viðmerkingunum vísir  tingmaðurin á,  at nú er ein tíð farin, síðani tað frættist um eina stórsligna ætlan at framleiða grøna orku til vinnuna við  vindmylnulundini Eysturlund.

-Íleggjararnir eru klárir  at  fara  í gongd,  men  bíða  eftir  neyðugum  loyvum.Vindmyllulundin  skal kunna framleiða 350 GWt, sum er tríggjar og eina hálva ferðir meir enn vindmylnulundin við Gellingarklett.

Víst verður á, at nú vindmylnulundin við Gellingarklett hevur verið virkin í tvey ár, kann staðfestast, at føroyska samfelagið hevur spart 28.000 tons av olju, omanfyri 85.000 tons minni CO2-útlát í mun til, um henda orka varð framleidd á oljurikna Sundsverkinum. Í krónum er sparingin omanfyri kr. 100 mió.

Sambært framleiðsluroknskapinum hjá SEV vórðu í 2023 framleiddir 458 GWt, herav eru  áleið  65 GWh  frá  Gellingarkletti.  Framleiðslukostnaðurin  uttan  vindmyllulundina við Gellingarklett hevði verið 107 oyru (491Mkr./458 GWh), og við framleiðsluni frá lundini við Gellingarklett er framleiðslukostnaðurin 96 oyru (441Mkr./458 GWh). Hetta er  ein  sparing  fyri  brúkaran  á  14  oyru  KWh  við  meirvirðisgjaldi  og  ein  sparing  fyri húsarhald og vinnu á 10% í framleiðslukostnaði.

Bárður á Steig Nielsen staðfestir  í sínum viðmerkingum, at vindmyllur  mugu setastupp  um  summarið, og  um  møguleiki  skal  verða  at  fáa vindmylnulundina upp í 2026, má loyvi fáast til vegar, so fyrireikingarnar kunnu fara í gongd  og vindmyllurnar  bíleggjast.

-Skal  grøna  orkuskiftið  fremjast  til  gagns  fyri borgarar og vinnu, hevur tað týdning, at tey, ið bjóða seg fram, fáa møguleikan, og tí verður spurt, um løgmaður ætlar at geva loyvi til Eysturlund og nær. Longur vit bíða, dýrari verður tað fyri samfelagið og umhvørvið sigur tingmaðurin í spurninginum til løgmann.