Heiðursmerki frá kongi og 45 ára starvsdagur

Tað var ein sannur hátíðardagur herfyri, tá ið Hákun Djurhuus, stjóri í Sev, handaði Tove Brink heiðursmerkið frá kongi fyri trúgva tænastu í fýrati ár, og Herluf Mortensen varð heiðraður fyri síni 45 ár á Sev.

Familja og starvsfelagaðar vóru savnað til hátíðarhald, og Hákun Djurhuus og Jón Nielsen, deildarstjóri fyri Netið, fluttu fram røður fyri Tove og Herluf, skrivar elfelagið í tíðindaskrivi.

– Felags fyri Tove og Herluf er, at tey eru bæði stilfør, men ótrúliga arbeiðssom. Tað skuldu bara eitt ella tvey orð til, so koyrdu verkætlanirnar við fullari ferð. Tove teknaði og var ómetaliga nærløgd og trúðføst, meðan Herluf helt skil á øllum tí formella. Tá kundu vit hvíla í, at alt var 100% í lagi.

– Ein rúkandi menning er farin fram hesi 40-45 árini hjá Sev, og tit hava bæði tvey sanniliga gjørt mun á hvør sín hátt segði Jón Nielsen, deildarstjóri fyri Netið.

Samstundis sum Tove og Herluf vórðu heiðrað, var hetta eisini fráfaringarløta teirra.

Tove hevur lagt blýantin frá sær og sløkt telduna seinastu ferð á Sev og fer nú at njóta arbeiðsfría lívið, meðan Herluf verður knýttur at Sev eina tíð afturat, skrivar Sev.