Putin viðgongur trot á brennievni

Russiski forsetin, Vladimir Putin viðgekk um vikuskiftið, at tað er eitt ávíst trot á brennievni í Russlandi.

Orsøkin er ukrainsk álop á oljuverk langt inni í Russlandi.

Tá lopið verður á týðandi undirstøðukervi, og serliga orkuundirstøðukervi, elvir tað sjálvandi til trupulleikar, sigur russiski forsetin.

– Í løtuni uppliva vit eitt ávíst trot, men tað er ikki álvarsligt, sigur hann sambært Ritzau.

Russiska stjórnin arbeiðir, sambært Putin, við at loysa trupulleikan.

Fyrsta uppgávan verður at fáa gongd á framleiðslu av betri loftverjuskipanum fyri at steðga slíkum álopum, sigur hann.