Nógvar orkuútbyggingar bíða eftir bretsku stjórnini

Tað kom fram á stóra orkutiltakinum í Aberdeen herfyri, har eisini landsstýrismaðurin í vinnumálum, Jacob Vestergaard var millum tey 300 umboðini  frá bretsku orkuvinnuni, sum vórðu komin saman at hoyra tað nýggjasta um støðuna og framtíðar útlitini hjá olju- og gassvinnuni í Bretlandi.     

Offshore Energies UK (OEUK), sum er meginfelagið hjá bretsku orkuvinnuni, sigur í seinastu búskaparfrágreiðing síni, ið varð løgd fram á orkutiltakinum, at 111 olju- og gassverkætlanir á bretska landgrunninum kunnu gerast búskaparliga lønandi, um bretska stjórnin fremur ávísar broytingar m.a. í skattaskipanini “Energy Profits Levy” og í skipanini fyri loyvi til leiting og framleiðslu. Stóra talið av verkætlanum er treytað av broytingum í sokallaða eykaskattinum. 

Sambært egnum greiningum hjá OEUK innihalda tær 111 verkætlanirnar tilsamans 3,25 milliardir tunnur av olju/gassi.  Vinnusamtakið metir harumframt, at broytingar í skattaskipanini kunnu vera við til at loysa upp fyri stórum upphæddum  í privatum íløgum.

OEUK hevur eisini lagt fram útrokningar av teimum breiðari búskaparligu avleiðingunum. Tær fevna millum annað um metingar av eyka skattainntøkum næstu tíggju árini og um økt virði fram móti 2035.

OEUK umboðar meira enn 400 fyritøkur og felagsskapir innan frálandavinnu og orku. Sambært samtakinum vísa teirra greiningar, hvørjar verkætlanir kunnu gerast búskaparliga lønandi, um røttu karmarnir eru til staðar.

Vilja broyta eykaskattaskipan

Ein av høvuðsboðskapunum hjá OEUK er, at “Energy Profits Levy”, eigur at verða broytt. Hetta er eykaskattur, ið varð lagdur á vinnuna, tá oljuprísurin varð ovurhøgur.

OEUK hevur leingi heitt á bretsku stjórnina um at broyta tíðarætlanina fyri avgjaldið. Í almennum frásagnum hava ymisk uppskot verið nevnd um, nær eitt nýtt avgjald skal koma í staðin fyri tað verandi, og eisini hevur verið tosað um treytir, sum knýta broytingarnar at olju- og gassprísum.

Bretska stjórnin hevur sagt, at ætlanin er at seta eitt nýtt avgjald í staðin fyri tað verandi í 2030. Tað kann tó henda fyrr, um eitt ávíst prísstig verður rokkið. Samstundis hevur stjórnin lagt dent á eina breiðari ætlan fyri reinari orku og arbeiðsplássum í Norðsjónum.

OEUK vísir eisini á loyvis- og eftirlitskipanina sum ein týdningarmiklan part av málinum. Sambært samtakinum er skjótari og greiðari viðgerð hjá myndugleikunum neyðug, um fleiri verkætlanir skulu gerast veruleiki.

Tvey av teimum olju- og gassfeltunum, sum hava verið nevnd í sambandi við málið, eru Rosebank og Jackdaw. Báðar verkætlanirnar hava verið ígjøgnum góðkenningarumfør og hava eisini verið fyri rættarligum avbjóðingum. Rosebank oljuleiðin liggur eystan fyri Føroyar. 

Góðkenningarnar av verkætlanunum vórðu avbjóðaðar í skotskum dómstólum nøkur ár herfyri, og myndugleikarnir arbeiða framvegis við teimum avgerðum, sum skulu takast.

Í sambandi við Jackdaw hevur OEUK eisini víst á, at verkætlanin kann vera eitt munandi íkast til gassveitingina í næstum, eitt nú um veturin, tá tørvurin á gassi til bretsku húsarhaldi fer at vaksa nógv. 

Mótstøða frá umhvørvisfelagsskapum

Ikki øll taka tó undir við metingunum hjá OEUK.

Umhvørvisfelagsskapurin Uplift heldur, at talið 111 er órealistiskt, og felagsskapurin ivast eisini í, hvussu stóran týdning verkætlanirnar í veruleikanum fara at hava fyri orkutrygdina og orkurokningarnar hjá húsarhaldum.

Uplift vísir millum annað á, at ein stórur partur av teimum olju- og gassnøgdum, sum framvegis eru eftir, er olja, og at ein munandi partur av framleiðsluni verður útfluttur.

Væntandi fer bretska stjórnin at taka støðu til tvær tær stóru útbyggingarnar í næstum og fer tann avgerði so aftur at hava stóra ávirkan á, hvussu verður við mongum av hinum ætlaðu útbyggingunum á bretska landgrunninum.