Danir skunda undir olju- og gassframleiðslu

Hetta verður gjørt fyri at tryggja orkutrygdina í ikki bara Danmark men í Vesturheiminum sum heild. Síðani russar gjørdu innrás í Ukraina er orkutrygdin vorðin fremsta málið í Evropa og í heiminum sum heild. Sanktiónir móti Russlandi hava gjørt, at Evropa nú manglar orku her serstakliga gass. Russland hevur annars verið høvuðsveitari av gassi til Evropa. 

Stóru ídnaðarlondini í ES t.d. Týskland, Háland og Italia vilja hava onnur lond í Evropa at økja um leiting og framleiðslu av olju og gassi. Støðan er vorðin so mikið álvarslig, at umframt at økja um gassframleiðslu verður dentur lagdur á at lata uppaftur bæði kolaorkuverk og kjarnorkuverk. 

Júst í hesum døgum verður týðandi stig tikið til at taka í brúk aftur størsta gassfeltið í Danmark, Tyra. Tað var latið aftur í 2019 vegna umvælingar og nútímansgerð. Nú verður so nýggjur útbúnaður tikin í nýtslu, og um eitt ár ella so kann Tyra fara undir aftur framleiðslu. Útbyggingin kostar 21 mia. kr.

Sum støðan er í dag kann Tyra feltið lata 90% av gassnýtsluni hjá Danmark. Tað, sum verður framleitt aftrat bæði frá Tyra og øðrum gassfeltum, kann so fara til at metta stóra gasstørvin í øðrum londum í Evropa. 

Umframt Tyra eru eisini fleiri onnur felt, sum nú veita orku til Evropa. Men orkunýtslan er so mikið stór, at tað, sum Tyra kann framleiða av gassi, nøktar bert 0,4% av orkunýtsluni í Europa. 

Heimsmet í lyfting á sjónum

Stóra søgan rundan um Tyra feltið er nýggja og áttanda modulið í útbyggingini, sum júst er komið úr Asia.  Tað vigar 17.000 tons og er tað størsta  lyftið í heimsøguni til havs, sum stóra kranaskipið Sleipner hjá Heerema hevur staðið fyri.  Tað er felagið TotalEnergies, sum stendur fyri hesum stóra feltinum, ið tað keypti frá Mærsk nøkur ár herfyri.