28. umfar: Nógv uppá spæl í kvøld

Í gjárkvøldið vórðu fýra dystir leiktir í Premier League. Talan var um fýra sigrar, ið allir kunnu fáa stóran týdning í botnstríðnum. Í kvøld eru hinir dystirnir í 28. umfari á skránni: Í tveimum av dystunum skulu oddaliðini í eldin; í tveimum eru tað lið, ið stríðast um 4. plássi ímóti liðum, ið kunnu verða innblandaði í botnstríðið. Ein dystur er ein botngysari, og so er eitt topp-seks brak, har tvey London-lið hittast:

19.45: Arsenal - Bournemouth 
           Southampton - Fulham

20.00: Chelsea - Tottenham 
           Crystal Palace - Manchester United
           Liverpool - Watford
           Manchester City - West Ham  

Eftir tapið hjá Tottenham fyri Burnley leygardagin, sær tað nú aftur út sum ein tvídystur millum Liverpool og Manchester City um meistaraheiti. Liverpool legði seg á odda sunndagin við 0-0 javnleikinum á Old Trafford. Seinni tann dagin vann Manchester City Carabao Cup-finaluna á Chelsea. Liðið hjá Klopp fær ikki heilt sítt spæl at koyra í løtuni, men liðið hevur góðan møguleikan at vinna sítt fyrsta meistaraheiti. City heldur fram at vinna dystir, og stríðið um 1. plássi er hart. Í kvøld eru bæði liðini greiðir favorittar á heimavølli, men talan kann vera um lumpisligar uppgávur. 

Tottenham skal reisa seg í kvøld, men talan er um eina trupla uppgávu. Chelsea leikti eina góða finalu sunnudagin, ið tó var yvirskýggjað av hendingini við málverjanum Kepa Arrizabalaga, ið ikki vildi skiftast út. Chelsea tapti brotssparkskappingina og skal nú fokusera uppá at koma í topp-fýra. Har eru Arsenal og United kapingarneytarnir, og tey skulu vinna sínar dystir í kvøld. Hjá United mangla nógvir leikarar; teir ið fóru út við skaða ímóti Liverpool umframt aðrir. 

Í Suðuronglandi hittast tvey lið, ið veruliga hava tørv á stigum. Serliga Fulham hevur tørv á at vinna dystin fyri at nærkast niðurflytingarstrikuni. Southampton kann í kvøld koma uppum hesa strikuna. Lagt er upp til ein ógvuliga inntensan dyst, har tað eins og aðrastaðni kring landið er nógv uppá spæl. 

Støðan: 

* Ein dyst fleiri