EM: Fá føroysk atgongumerki eftir

Síðst í november og fyrst í desember skulu føroysku kvinnurnar spæla EM-endaspæl í Sveis.

Allir dystirnir í bólkaspælinum verða spældir í Basel. Atlantic Airways flýgur beinleiðis til sveisiska býin 27. november og aftur eina viku seinni, og ferðaskrivstovan 62N ætlar at koma við einum bólkatilboði.

Eftir lutakastið miðskeiðis í apríl søgdu umboð fyri Hondbóltssambandið seg vóna, at heilt nógvir føroyingar fóru til Sveis, og at hýrur líknandi honum í Berlin fór at síggjast. Ein vón um "nakrar túsund føroyskar áskoðarar" varð nevnd.  

Sí eisini: 
Andrass Thomsen: - Vóna at endurskapa góða stemningin
Hallur Danielsen: - Vóna at síggja nógvar føroyskar áskoðarar í Sveis

Tað hevur tó víst seg at verið trupult at fingið nógv atgongumerki til føroyska øki í høllini. Í fyrstu syftu var talan um umleið 300 atgongumerki.

St. Jaokbshalle er stór og tekur vanliga millum 8.000 og 9.000 fólk til hondbóltsdystir. Trupulleikin er tann, at Føroyar eru í bólki við Sveis. Fyrst varð tað sæð sum nakað jaligt, at lutakastið gav eina vertstjóð. Hetta gevur tó praktiskar avbjóðingar, um Føroyar skulu hava heilt nógvar áskoðarar við til Sveis.

Savnsmynd: Sverri Egholm

Heimaliðið skal hava meginpartin av atgongumerkjunum, sum eru galdandi til báðar dystirnar í einum umfari í bólkinum. Portalurin hevur fingið upplýst frá Hondbóltssambandinum, at tað bert eru 300 føroysk atgongumerki tøk í fyrstu syftu - høllin er býtt upp í bólkar eftir londuinum.

Atgongumerkini vórðu sett til sølu í síðstu viku, og nú eru bert beint omanfyri 50 eftir, upplýsir HSF. Her er talan um ein pakka fyri allar tríggjar dystirnar.

Til ber at keypa hesi atgongumerkini HER - EURO-FAR skal veljast í ávísta teignum

Harvið ræður um at skunda sær, um ein ætlar til Sveis og ætlar at sita í føroyska økinum í St. Jakobsehalle. Umbøn er tó send til EHF um at fáa fleiri atgongumerki, tá sponsorar í Sveis og onnur helst lata nøkur atgongumerki inn. Eisini væntast at Kroatia helst ikki fær eini 300 fólk við sær. Í so fall fer restin av teimum atongumerkjunum møguliga til Føroyar.

Til seinasta dystin hjá Føroyum eru nógv dagsatgongumerki tøk. Hesin er ímóti Danmark. HSF viðmælir føroyingum at keypa í sektión A2, sum er uppat føroysku áskoðarunu, um man bert velur hendan dystin. Hendan dagin skal sveisiska hondbóltssambandið ikki nýta eins nógv atgongumerki sum á dystardegi 1 og 2.

Yvirlitið fyri dagsatgongumerki er her