Fyrsta hálvfinalan verður í Vestmanna í kvøld

Sunnudagin endaði grundspælið í Okkara-deildini. Eftir 18 umfør var greitt, at Kyndil endaði nummar fýra við 21 stigum, og at trý lið endaðu á 25 stigum. Tey vóru Neistin, VÍF og H71. Hoyvíkingar vóru sterkast innanhýsis, og tí sluppu teir at velja, hvat mótstøðuliðið skal vera í hálvfinaluni. Valið fall á VÍF, og liðini hittast í kvøld. 

Tað er ikki uttan orsøk, at Sonni Larsen og H71 hava valt at spæla ímóti VÍF. Í fyrsta dystinum millum liðini í  november vann H71 við heili 12 málum í Vestmanna. Hinir báðir dystirnir í landskappingini vóru meira javnir, men føroyameistarin var í báðum førum omaná við fýra málum.  Í avgerandi dystinum í bólkaspælinum í steypakappingini vann H71 30-27, og sendi vestmenningar út. Fýra dystir og fýra sigrar til H71, sum harvið hevur yvirtakið og er favorittur til uppgerðirnar. Um VÍF tó fær ein sigur í kvøld, so kann alt henda í Hoyvík.   

Grannarnir Kyndil og Neistin eru í hinari hálvfinaluni. Fyrsta uppgerðin millum teir bláu og teir grønu verðrur í annaðkvøld. Seinnu hálvfinalurnar eru sunnudagin, og um liðini tá hava vunnið hvør sín dyst, so verður ein triðja hálvfinala spæld mikudagin 27. mars.