Martin Wood nýggjur hjálparvenjari hjá 07 Vestur

07 Vestur hevur sett 29 ára gamla danan, Martin Wood, í fulltíðarstarv sum hjálparvenjari hjá liðnum í Betrideildini.

Hesum boðar 07 Vestur frá á heimasíðu sínari

- Martin, sum áður hevur staðið á odda fyri at leiða 1. deild hjá B36 upp í toppin, kemur við drúgvum royndum og vitan, ið fer at styrkja okkara hóp munandi.

Martin Wood verður ikki "bert" hjálparvenjari. Felagið skrivar, at hann verður eisini knýttur at teimum yngru leikarunum, har hann skal virka sum eitt slag av transitiónvenjara.

- Hetta merkir, at hann fer at tryggja, at okkara ungu evnaríku leikarar fáa tann stuðul og vegleiðing, teimum tørvar, fyri at taka næsta stigið og gerast partur av Betri-hópinum.

Martin Wood hevur áður arbeitt saman við Dan Brimsvík. 

- Vit vilja hava eitt spennandi og mennandi venjingarumhvørvi, og her passar Martin væl inn. Hann er Martin er nærlagdur, arbeiðssamur og dugir væl við einstaka leikaranum - nakað sum verður vektað høgt, sigur høvuðsvenjarin 

Martin hevur gjørt tvey ára sáttmála við 07 Vestur. Hann avloysir Tór-Ingar Akselsen, sum hevur verið hjálparvenjari síðani 2020.