U19 NEVZA kappingin í flogbólti verður í Føroyum

Hesum boðar Flogbóltssamband Føroya frá í tíðindaskrivi.

Seinastu árini hava hesar kappingarnar verið hildnar í Rovaniemi í norðara parti av Finnlandi, men næstu trý árini verða tær í Havn.

- Høllin á Hálsi verður við tveimum flogbóltsvallum karmur um kappingarnar og í 2025 kunnu kappingarnar vónandi vera í høllini við Tjarnir.

Tað var í fjør, at FBF fekk bjóðað at gerast vertur fyri árligu U19 NEVZA kappingunum.

NEVZA er norðuratlantiska økið undir CEV og eru limalondini Ísland, Føroyar, Noreg, Svøríki, Finnland, Danmark og Ongland.

Til kappingina síðst í oktober luttaka 11 lið hjá kvinnum og monnum: Finnland verður als ikki við, og Noreg luttekur ikki við teirra dreingjaliðið. 

- Talan er um eitt rættuliga stórt tiltak við nógvum formligum ásetingum. Ein av eldsálunum innan føroyskan flogbólt, Hanna Helena Weihe Simonsen, hevur átikið sær at verða kappingarleiðari og at samskipa fyrireikingarnar av kappingunum, skrivar FBF at enda.