2024-10-16 07:11 
Agnar Prestá
Agnar Prestá
Føroysku U17-dreingirnir hava sum heild staðið seg væl í NEVZA-kappingini í flogbólti, sum í hesum døgum er í Danmark.
Føroyar vunnu á vertunum - einum av liðnum hjá Danmark - tíðliga týsdagin, og skuldu harvið spæla hálvfinalu í Herning í gjárkvøldið.
Finnland var omaná, men Føroyar bjóðaðu av álvara sterka liðnum av í 2. setti og 3. setti.
- Føroyar bitu væl frá sær, og bara í fyrsta setti var stórur munur. Stuttligt var at síggja góða hugburðin hjá føroysku leikarunum, sum ikki fóru niður við nakkanum, men ístaðin løgdu seg á odda 7-3, 15-7 og 18-11 í øðrum setti. Tá kom stígur í, og Finnland javnaði síðani til 19-19 og vann settið 25-20.
- Aftur í triðja setti løgdu Føroyar seg á odda, 8-4, áðrenn Finnland javnaði til 8-8 og fór framum 18-12. Men Føroyar høvdu ikki givið skarvin yvir og minkaðu um munin aftur niður í bara tvey stig, 18-20 og 21-23, áðrenn Finnland vann 25-22.
Hálvfinalan (U17 dreingir): Finnland - Føroyar 3-0 (25-15, 25-20, 25-22)
Soleiðis skrivar Flogbóltssamband Føroya á heimasíðu sínari um hálvfinaluna.
Tapið merkir, at Føroyar skulu spæla bronsudyst í norðurlendsku flogbóltskappingini fyri ungdómslið. Uppgerðin verður móti Svøríki klokkan 11.
Eingin stroyming er, men til ber at fylgja við beinleiðis HER.
Kelda: Flogbóltssamband Føroya
Vinarliga broyt tínar kennifíla - og privatlívsstillingar fyri at síggja hetta innihald