Páll varð greiður toppskjútti

Í 2012 rakk hann 22 málum. Hetta var sama tal sum Clayton Soares, men brasilianski ÍF-áleyparin fekk formliga heiðurin og harvið gullskógvin, tí KÍ-áleyparin hevði spælt flest minuttir.

Nú, tólv ár seinni, kom Páll Klettskarð aftur á 22 mál og við málinum í Fuglafirði í dag uppum tað - hann hevði tó allarhelst rokkið tí í fjør, um ein skaði ikki rakti í juni.

Royndi málrevurin fer eisini at fáa gullskógvin í ár. 23 mál eru átta mál fleiri enn tann næstovasti á toppskjúttalistanum. Talan er um Petur Knudsen úr NSÍ. Hann skroraði fýra brotsspørk fleiri enn Páll, sum bara eigur eitt av sínum landskappingarmálum í 2024 úr ellivu metrum.

Páll Klettskarð hevur skorað í heili 16 ymiskum Betrideildardystum í hesum kappingarárinum (Savnsmynd: Sverri Egholm)

Okkurt árið hevur Páll Andrasson Klettskarð verið meira avgerandi í stórum dystum, men KÍ hevur ikki havt eins gott ár sum undanfarin ár. 

Páll hevur tó megnað at sett persónligt met og nærum skorað eitt mál fyri hvønn Betrideildardyst, sum hann hevur spælt í ár. 

Nummar níggju hjá KÍ er nú 34-ára gamal. Í ár er hann komin uppum 200 mál í fremstu føroysku deildini - og upp á tíggju evropeisk mál. Samanlagt hevur framherjin skorað 205 mál í 352 Betrideildardystum. Bert Klæmint Andrasson Olsen hjá NSÍ hevur gjørt fleiri mál (239 mál í 46 fleiri dystum enn Páll)

Tøl: FaroeSoccer