Tað verður eisini stór upphiting í Sveis

Nú styttist til kvinnulandsliðið skal spæla EM-endaspæl í Basel í Sveis, og í tí sambandi koma fleiri ting á breddan.

Í dag eru tað tað nakrir av stórstuðlunum hjá Hondbóltssambandinum, sum kynda. Eins og í Berlin skipa Føroya Banki, Wenzel, Atlantic, Effo og Smyril Line fyri upphiting áðrenn allar bólkaspælsdystirnar í Basel.

Undir EM-endaspælinum í Berlin vóru stórar upphitingar við føroyskum tónleiki, góðum "føoryskum lagi", andlitsmáling og nógvum øðrum (Myndir: Sverri Egholm)

- Nærri kunning um upphiting og staðseting kemur seinni á Basel.fo. Men upphiting verður áðrenn allar dystirnar, har vit bjóða andlitsmáling, klapparar og góðan hýr, so vit eru til reiðar at koyra á Føroyar saman. Upphitingin verður tætt uppá høllina, so mann kann ganga frá upphiting til dyst.

Heimasíðan, ið fyriskipararnir nevna, er nýgjørda heimasíðuna Basel.fo. Eins og í Berlin í januar, verður føroyska heimasíðan brúkt til kunning í sambandi við EM-endaspælið í Basel - eitt nú upphiting, dystir, fjepparaætlanir o.a.

Sambært Andrassi Thomsen verður roknað við umleið 400-500 føroyingunum til søguliga EM-endaspælið í Sveis. Hetta segði stjórin í Hondbóltssambandinum við 3-2 í gjárkvøldið.

Heimasíðan basel.fo boðar frá, at nakrar sergjørdar t-shirtir eru gjørdar til endasmálið - peningurin fyri tær fer eisini til gott endamál. Talan er um "Í menniskjum góður tokki" sum hesa tíðina letur jólahjálp til fleiri hundrað fíggjarliga sperdar barnafamiljur.

Elsa Egholm og Turið Arge Samuelsen, sum skulu til Sveis í næstu viku, í nýgjørdu blusunum (Mynd: basel.fo)

Kvinnulandsliðið er nú savnað í Føroyum og hevur eina rúgvu av venjingum, vitjanum og øðrum næstu vikuna, áðrenn farið verður til Sveis mikudagin 27. november. 

Venjingardystir eru á skránni fríggjadagin (klokkan 19 í Klaksvík) og leygardagin (klokkan 16 á Skála). Báðir eru móti Svøríki B.

EM-dystirnir í Basel (føroysk tíð)

Sveis - Føroyar: 29. november, klokkan 17.00
Kroatia - Føroyar 1. desember klokkan 14.30 
Føroyar - Danmark 3. desember. klokkan 17.00