Finnur Justinussen setur gaggurnar á hillina

Hann eigur ein gullskógv fyri at gerast toppskjútti í 2011 og fimm steypagull. Í ár hevði Finnur Justinussen stóran leiklut í FM-heitinum hjá Víkingi - nummar tvey sum hann hevur verið við at vunnið fyri barndómsfelagi.

Finnur Justinussen hevur bert umboðað GÍ og Víking í Føroyum. Eftir flotta árið í 2011 skifti syðrgøtumaðurin til Jonköbing Södra í næstbestu svensku deildini. Tað var tó í næstbestu donsku deildini seks ár seinni, at Finnur Justinussen veruliga gjørdi vart við seg. Hann skoraði 22 mál í 32 landskappingardystum fyri Næstved og var á heysti 2018 toppskjútti í 1. Division.

Góðar tíðir í Næstved.

Álvarsamur skaði í 2021...


Men nummar 17 kom aftur, sum man kennir hann (Mynd: Jens Kr. Vang)

Hvør sínumegin hetta væleydnaða uppihaldið í Næstved spældi Finnur við Framad Amager og ÍF Føroyar eitt stutt skifti. Hann kom aftur til Føroyar í 2020 og fór beint aftur at skjóta mál í Betrideildini. Ein krossbandsskaði tíðliga í 2021 setti fótbóltsleiðina í vanda, men Finnur spældi í 2022 leiklut í steypagulli og silvurið í Betrideildini.

Í ár hevur nú 35-ára gamli áleyparin skorað 11 mál í samanlagt 33 dystum, sambært FaroeSoccer. Snildi og hartarbeiðandi gøtumaðurin byrjaði kappingarárið ógvuliga væl, og hansara 10 mál hava gjørt sítt til í gullárinum í Sarpugerði. Eisini skoraði Finnur Justinussen sítt triðja evropeiska mál í 2-0 sigrinum á Liepaja, tá Víkingur spældi seg víðari í 1. umfari í Conference League.

Nú takkar áleyparin, sum eisini spældi 6 A-landsdystir, fyri seg á hægsta stigi í Føroyum.

Víkingur skrivar soleiðis á síðu sínari í dag: 

Eftir 14 kappingarár og 155 mál fyri besta liðið hjá GÍ/Víkingi, og eitt tíðarskeið uttanlands, hevur Finnur Justinussen valt at takka fyri seg á hægsta stigið.