Danmark og Noreg skulu spæla EM-finalu sunnudagin

Eins og fyri tveimum árum síðani, skulu Danmark og Noreg spæla EM-finalu hjá kvinnum. Hetta er greitt eftir hálvfinalusigrarnar hjá skandinavisku stórveldunum í kvøld.

Ungarn hekk eitt sindur í Noreg fyri steðgin, men tíðliga í 2. hálvleik í Wieni fóru evropeisku meistararnar og olympisku meistararnar frá, og tað gjørdist ongantíð veruligur spenningur um endaliga úrslitið. 

Noreg vann 30-22, og var tað heimsins besti spælari, Henny Reistad, sum gekk á odda. Toppskjúttin legði eisini upp til nógv mál, og tað liggur uppaftur meira á Reistad, nú Nora Mørk ikki er við (við barn), og Stine Oftedal er givin. 

Henny Reistad er greitt størsta norska stjørnan nú, og spældi hon eisini eina góða hálvfinalu, tá tað eydnaðist at vinna tryggan sigur á Ungarn (Mynd: EPA)

Fimta stóra endaspælið á rað er Noreg í finaluni. Tær skulu royna at endurvinna í seinasta dystinum hjá Thorir Hergeirsson, sum hevur verið høvuðsvenjari hjá Noreg síðani 2009. Aftur er tað Danmark, sum skal basast, um gullið skal í hús til eitt EM-endaspæl.

Seinastu árini hava donsku kvinnurnar vunnið seg til at vera fastan gest í hálvfinalum. Seinasta gullið liggur tjúgu ár aftur í tíðini, men nú er Danmark aftur ein dyst frá. Tær í reyðum tóku skjótt leiðsluna og misti hana so at siga ikki aftur. Frakland var ongantíð frammanfyri men bjóðaði Danmark av so at siga allan vegin.

Anne Mette Hansen, sum spælir í Fraklandi til dagliga, gjørdist toppskjútti í dystinum við sjey málum og var eisini við í teimum flestu málunum hjá Danmark (Mynd: EPA)

Tað var 13-11 til Danmark í steðginum, og tað eydnaðist eisini bólkamótstøðuliðnum hjá Føroyum at skora í fyrsta álopinum eftir steðgin. Síðani steðgaði tað fullkomiliga upp í álopinum, og næstu tíggju minuttirnar skoraði Danmark einki mál. Tað var 14-14, og so tók Anne Mette Hansen sakina í egnar hendur: Hon vann brotskast, skoraði sjálv, og brádliga fekk Danmark seks mál á rað.

Hetta varð ov nógv at heintað hjá heimsmeistarunum. Serliga tá danska verjan var ógvuliga stinn, og Anna Kristensen vísti heimsklassa spæl í málinum. 16 bjargingar (43 prosent) og dagsins leikari, og saman við omanfyrinevndu Anne Mette tók Esbjerg-málverjin risa ábyrgd. Mia Højlund skúgvaði allan iva viks við flottum máli; Jesper Jensen vann taktiska dystin uttanfyri vøllin, og tær donsku kunnu fegnast.

Venjarin Jesper Jensen og málverjin Anna Kristensen hálvsfevnast á hallargólvinum í Wien beint eftir seinasta bríksl (Mynd: EPA)

(Mynd: DHF)

EM-hálvfinalur
Fríggjakvøldið 13.12 í Wiener Stadthalle

Noreg - Ungarn 30-22 (13-11)

Danmark - Frakland 24-22 (13-11)

Danmark og Noreg spæla EM-finalu sunnudagin klokkan 17 føroyska tíð. Noreg vann 27-24, tá liðini hittust í meginumfarinum í síðstu viku.