Gekk ikki hjá Gunnari og teimum

So nær við og tó. Tað var málleyst í 70 minuttir í Athen, og harvið var Víkingur Reykjavík á veg víðari til enn eitt umfar í Conference League. Fyrri dysturin, sum var í Finnlandi vegna leikvallarstøðu í Íslandi, endaði 2-1 til liðið hjá Gunnari Vatnhamar.

Filip Mladenovic sló brádliga til fyri Panathinaikos, og síðani lá tað til at fara í longda leiktíð í 25 minuttir. 

Men í yvirtíðini gekk galið hjá gestunum. Grikska liðið gjørdi sær dælt av deyðbóltsstøðu og breyt íslendsk hjørtu. 2-0 á kvøldinum og samanlagt 3-2 til Panathinaikos sum er víðari til áttandapartsfinalurnar í Conference League.

Flott evropeisk avrik samanlagt hjá víkingunum; einki íslendskt lið er áður komið víðari úr einum deildarspæli/bólkaspæli.

Gunnar Vatnhamar var týðandi spælari á ferðini og skoraði millum annað eitt mál í sigri í deildarspælinum. Skaðar hava darvað seinastu tíðina, og tí spældi 29-ára gamli leirvíkingurin ikki í fyrra dystinum. Gunnar kom inn eftir 80 minuttir í gjár.

Gunnar fekk um endan av evropeiska ævintýrinum - hann og liðfelagarnir iðra seg tó um, at teir ikki fingu longt tað (Mynd: Víkingur Reykjavík)

Liðini hjá Hanusi og Sylvan eru víðari

Slovenska meistaraliðið NK Celje spældi seg víðari til áttandapartsfinalurnar við flottum 2-0 sigri á APOEL Kýpros. Hanus Sørensen spældi tó ikki nakran leiklut. Landsliðsspælarin hevur umboðað HB tíðliga í kappingini og hevur tí ikki loyvi at spæla fyri Celje í hesari Conference League-kappingini.

Sylvan Jakobsen hevur eisini umboðað eitt annað felag í kappingini, men somu reglur eru ikki galdandi fyri liðleiðarar. Tískil fekk klaksvíkingurin yvirtíð í Írlandi í gjár - og kundi at enda stórfegnast.

Shamrock vann fyrra dystin í Molde (0-1), men tíðliga í gjár skoraði Magnus Eikrem, sum eisini skoraði á Tórsvølli í 2023. Einki mál kom afturat næstu 110 minuttirnar, og so var neyðugt við brotssparkskapping í Írlandi. Har skoraði Molde uppá øll síni skot og er harvið millum tey seinastu 16 í kappingini; við einum føroyskum liðleiðara ("Kit manager").

Sylvan Jakobsen fegnast her um sigurin hjá KÍ eftir brotssparkskapping í Göteborg í Champions League í 2023. Í gjár var hann aftur á vinnandi liðnum til hádramatiskan tvídyst (Savnsmynd: Sverri Egholm)