Agnar Prestá
Fram livdi upp til favorittleiklutin og vann íslendsku steypafinaluna hjá monnum á Ásvöllum.
Jóhannes Bjørgvin og teir royndu. Stjarnan var aftanfyri 14-12 í steðginum og 19-24, tá tólv minuttir vóru eftir. Síðani gekst tó skjótt, og tá føroyski vinstri vongurin Jóhannes Bjørgvin í 52. minutti skoraði sítt fyrsta mál í dystinum, var bert eitt mál á muni (24-25) og háspenningur í kókandi høllini á Hafnafjørðinum.
Teir hjá Stjarnuni høvdu helst nýtt nógva orku at koma so nær, og Fram lyfti seg aftur. Reykjavíkar-felagið skoraði trý mál á rað, og so vendist ikki við.
Tað eydnaðist ikki Stjarnuni at gera sum í 2007 og vinna steypið í finalu móti Fram. Silvur til Jóhannes og teir.
Íslendska steypafinalan hjá monnum 2025
Fram - Stjarnan 31-25 (14-12)
Haukar, sum fleiri føroyingar hava spælt við, vann steypafinaluna hjá kvinnum á sínum heimavølli.
Í fjør vunnu Allan Norðberg og Valur steypakappingina.
Vinarliga broyt tínar kennifíla - og privatlívsstillingar fyri at síggja hetta innihald