Alda Nielsdóttir
Hondbóltssambandið og høvuðsstuðulin seinastu níggju árini, Føroya Banki, hava longt samstarvið.
Gunn Ellefsen, forkvinna í Hondbóltssambandinum, og Rúna N. Rasmussen, marknaðarleiðari í Føroya Banka, undirskrivaðu fyrradagin stuðulsavtalu fyri komandi tvey árini, 2026 og 2027.
Longda avtalan varð undirskrivað mikudagin, í hálvleikinum í kvinnulandsdystinum millum Føroyar og Litava, skrivar Hondbóltssambandið.
– Umframt at vera við til at tryggja fíggjarliga grundarlagið undir føroyskum hondbólti, er Føroya Banki eisini ein aktivur viðleikari, sum er við í flestu tiltøkunum vit hava, sigur Gunn Ellefsen.
– Høvuðssæti hjá Føroya Banka á Oknarvegi, hevur hýst fundum, fyrilestrum, galla og øðrum tiltøkum hjá HSF, og er Føroya Banki somuleiðis við til okkara dystir og tiltøk, bæði í Føroyum og uttanlands. Hetta eru tiltøk, sum hava savnað hondbóltsføroyar og tjóðina sum heild, og vit halda, at vit við at lyfta og standa saman hava rokkið langt og kunnu røkka enn longri.
Rúna N. Rasmussen sigur, at tey í Føroya Banka eru bæði fegin og errin um at halda fram sum høvuðsstuðul hjá Hondbóltssambandinum.
Vinarliga broyt tínar kennifíla - og privatlívsstillingar fyri at síggja hetta innihald