Íslendski bronsudreymurin brast í Boxen

Eftir tapið fyri Danmark í hálvfinaluni, høvdu íslendingar framvegis møguleikan at vinna sær EM-heiðursmerki í Herning.

Hevði Ísland vunnið á Kroatia í dag, hevði talan verið um javnsett besta íslendska úrsliti í einum EM-endaspæli: Liðið vann bronsu í Eysturríki í 2010.

Men soleiðis skuldi tað ikki vera. Íslendingar sóu nakað slitnir út og høvdu torført við at finna loysnirnar og plássið móti ágangandi kroatisku verjuni. Eftir 17 minuttir hevði Ísland bert skorað seks ferðir.

Tað gjørdist tó nakað betri. Í steðginum var støðan 17-14 til Kroatia, ið spældi meira sannførandi í 1. hálvleiki og eisini við stórum eldhuga.

Eins og í øðrum bronsudystum var talan um undirhald, og tað var eisini til tíðir rótut og hart. Samanlagt vóru tólv útvísingar í bronsudystinum, har Ísland fekk fleiri.

Sí fleiri tøl her

Dagur Sigurðsson kann hóast alt fegnast um eitt EM-heiðursmerki (Mynd: EPA)

Sí eisini: Hetta er skelkandi - skulu inn í bussin sum frystir høsnarungar

Bæði liðini løgdu nógv fyri at vinna sær bronsuna, og Ísland stríddist allan vegin. Ómar Ingi Magnusson skoraði uppá øll síni tólv skot - so at siga øll vóru brotskøst - og Viktor Gísli Hallgrímsson bjargaði tveimum kroatiskum brotskøstum seinastu løtuna. Hetta helt lív í íslendsku vónini, men tað endaði 34-33 til Kroatia.

Harvið kundu íslendski venjarin hjá Kroatia, Dagur Sigurðsson, og hansara menn fegnast um heiðursmerki annað endaspæl á rað, hóast tað ikki varð gull (HM-silvur í fjør). 

EM-endadagur
Sunnudagin 1. febuar 2026 - Jyske Bank Boxen

Bronsudystir
Ísland -Kroatia 33-34 (14-17)

Finala
17.00: Danmark - Týskland (TV2/TV2 Play)

Les eisini:Fara eftir triðja gullinum á rað