Kristvør Clementsen fyrsti føroyski heimsmeistarin í ár

Leygardagin og sunnudagin kappaðust føroysku landsliðsrógvararnir "yvir alnótina" á Kambsdali.

Onnur ár eru føroyingar farnir til Boston ella aðrastaðni at kappast um HM í inniróðri, men nú koyrir tað uppaftur meira við tøkni.

Føroysku rógvararnir standa seg framvegis ógvuliga væl á heimspallinum, og sjey rógvarar stríddu seg til HM-finalur - fýra teirra til fleiri. 

Les eisini: Framúr gott vikuskifti hjá føroysku landsliðsrógvarunum

Tvær róðu eisini finalur um vikuskifti. Talan var um Kristvør K. Clementsen í U17-bólkinum og Jóhonnu av Steinum í bólkinum 45-49 ár. Fyrrnevnda gjørdist fyrsti heimmeistari yvirhøvur á 5.000 metra-teinum, meðan Jóhanna av Steinum eftir grótharða kapping endaði á 2. plássi.

Soleiðis skrivar Róðrarssamband Føroya um róðrarnar

Heimsmeistari í U17 – 5000 metrar

Unga hoyvíksksdaman Kristvør K. Clementsen kann nú kalla seg heimsmeistara í U17 á 5000 metrum. Hon róði ein sera sannførandi róður og lat ongantíð iva vera um, hvør hevði tamarhald á støðuni. Við hesum er hon fyrsti heimsmeistarin í U17 á 5000 metrum.

Silvur eftir dramatiskan róður

Í aldursbólkinum 45–49 ár vann Jóhanna av Steinum silvur á 5000 metrum. Hon hevði eina spennandi uppgerð við bretsku Nicole Johnson. Eftir at hava togað seg framum í miðróðrinum og ligið á odda stóran part av teininum, varð hon yvirhálað seinastu metrarnar eftir ein harðan endaspurt frá mótstøðukvinnuni. Ein sera sterk og heiðurlig silvurmedalja.

Jóhanna av Steinum

Tær báðar og fimm onnur skulu rógva HM-finalur 28. februar. Hetta verður í Fuglafirði:

Føroysku finalurógvararnir

Vár G. Hansen – 1 minutt og 1000 m
Sarita K. Hansen – 1 minutt og 5000 m
Jóhanna av Steinum – 1 minutt
Vár í Húsunum – 1 minutt
Kristvør K. Clementsen – 1000 m
Símun Heinesen – 5000 m
Pauli Joensen – 1000 m

Yvirlit kemur seinni í vikuni