Nógv á skránni hjá U-landsliðunum í summar

Hóast hondbóltskappingarnar í landinum eru av, so er nógv lív og gongd í hallunum kring landið, og tað er eitt spennandi summar fyri framman hjá nógvum ungum føroyskum hondbóltsleikarum. 

Hondbóltssambandið skrivar, at øll ungdómslandsliðini í hondbólti eru altíð serliga virkin í summarmánaðunum og hetta summarið er einki undantak, tí stórar kappingar liggja fyri framman.

Tað verður vant fram ímóti hesum kappingunum, og seinasta vikuskiftið vóru øll ungdómslandsliðini hjá Hondbóltssambandinum í gongd, og ungu leikararnir skulu brúka nógv orku komandi tíðina til at fyrireika seg til stóru uppgávurnar.

U17-landsliðið við monnum skal fyrst í eldin. Tað verður til EM-kapping í Svøríki, sum verður í døgunum 1. til 5. juli. Hetta er fyrstu ferð, at hesin aldursbólkur skal vera við í altjóða kapping.

(U17: Flestu leikararnir eru føddir í 2002; nakrir í 2003 - Mynd: HSF)

Um miðjan juli (frá 15. til 21.), skal U19-landsliðið við kvinnum taka lut í HM-kapping í Litava. Fleiri av leikarunum sum venja við har eru lyklaleikarar í bestu kvinnudeildini í Føroyum, umframt at nakrir leikarar spæla uttanlands. Talan er tí helst um eitt sterkt landslið.

Í august skal U17-landsliðið við kvinnum spæla í Georgia. Hetta er eisini talan um HM-kapping. Leikararnir í hesum aldursbólkinum royndu seg á fyrsta sinni í altjóða kapping í fjør summar.

(Einasti aldursbólkur, sum onga kapping hevur í summar, er 2000. Leikararnir venja tó eisini í summar. Hesin árgangurin skal næsta ár taka lut í HM-kapping fyri U20-landslið - Mynd: HSF)