Annað

Mjølnir syfti TB og tók fyrsta steypið við Tjarnir

Við frálíkum álopsspælium umframt góðum blokki og móttøkum, setti Mjølnir seg á dystin og vann rímiliga sannførandi: 3-1 í settum.

Mynd: Jens Kr. Vang

2026-04-25 18:16

Agnar Prestá

Bónussteypakappingin, kvinnur:
Mjølnir – TB 3-1 (25-17, 25-19, 22-25, 25-20)

Tað eydnaðist ikki í FM-finalunum, men seinnapartin spældu Mjølnir-kvinnurnar eina flotta steypafinaluni móti TB, ið var í finaluni fyri fyrstu ferð síðani 2017.

Mjølnir fekk skjótt álopið á glið og skjótt sótu blokkur og móttøkur eisini.

TB tók 3. sett, men annars var ikki so stórur ivi: Kvinnurnar úr Klaksvík vunnu trý sett trygt, og kundu lyfta steypið aftaná

Flogbóltssamband Føroya skrivar soleiðis um finaluna:

Annað árið á rað eru kvinnurnar hjá Mjølni steypavinnar eftir sannførandi 3-1 sigur á TB.

1. Sett: Eftir at tað hevði gingið javnt á til 7-7 í fyrsta setti, vann Mjølnir næstu seks bóltarnar á rað og fór framum 13-7, og tað gjørdist ov tung hjá TB at toga innaftur, og Mjølnir vann settið 25-17, tá ið TB smassjaði síðsta bóltin í antennuna.

2. Sett: Í øðrum setti legði Mjølnir seg framum 5-0 og helt frástøðuna stóran part av settinum. Móti endanum av settinum mentist TB og minkaði um munin til 18-19 og 19-20. Nærri kom TB tó ikki, tí Mjølnir vann tað, sum eftir var av settinum, og settbóltin sló Nicola Toftegaard í fingraspíssarnar á TB-leikarunum og út til 25-19.

3. Sett: Men TB var komið meira fyri seg, og við seks bóltum á rað fór TB framum 13-9 í triðja setti og helt stand, til Sharon Holm Haynes lobbaði bóltin yvirum til 25-22 til TB.

4. Sett: TB elti mesta partin av fjórða setti, men stigini hjá báðum liðum komu í stimum; eini fýra til annað liðið og so fýra til hitt, og soleiðis var TB bara tvey stig aftanfyri við støðuna 17-19, tá Mjølnir so líðandi dró frá og fór framum 24-18. TB hóraði undan teir fyrstu tveir dystarbótarnar, men so langaði Ásla Johannesen, sum eisini varð vald til dagsins leikara, triðja dystarbóltin í gólvið hjá TB til 25-20 til Mjølnir og níggjunda steypafinalusigurin hjá felagnum.

Ásla Johannesen spældi ein frálíkan dyst fyri Mjølnir (Mynd: Jens Kr. Vang)

Fleiri myndir seinni

Vinarliga broyt tínar kennifíla - og privatlívsstillingar fyri at síggja hetta innihald