KÍ'ararnir farnir við leiguflogfari til stóru uppgávuna

Klokkan 11 fór flogfarið hjá Sun Air of Scandinavia uppfrá í Vágum. Kósin varð sett í ein landsynning - til Poznan har tað eftir ætlan verður lent um eina løtu.

Tað er í pólska býnum, at føroyameistararnir hóskvøldið skulu spæla fyrra dystin í 3. umfari í Europa League.

Dysturin byrjar klokkan 18, og KÍ skal royna at fáa eitt brúkligt útgangsstøði til heimadystin á Tórsvølli, sum verður hósdagin 13. august.

Sí eisini: Fútin blandar seg uppí evropeiskan fótbólt: KÍ noyðist á Tórsvøll av trygdarávum

Lech Poznan hevur vunnið tvey pólsk meistaraheitið á rað. Liðið tveitti stóra leiðslu fyri borð í heimadystinum móti AGF í síðstu viku. Harvið er Lech ikki longur í Champions League men heldur stórfavorittur at fara víðari samanlagt móti KÍ.

Árni Frederiksberg staðfesti fyri FM1 sunnudagin, eftir sigurin á B36, at hetta liðið man vera eitt stig upp í mun til Ferencvaros. Ungarska meistaraliðið er størsta liðið, KÍ higartil hevur sent út í evropeiskari kapping.

Um KÍ ikki kemur víðari, bíðari play-off í Conference League - triðju evropeisku kappingini. Har verður mótstøðuliðið Gyor (Ungarn) ella FC Riga (Lettland)

Gilli Rólantsson Sørensen umborð á flogfarinum fyrr í dag (Mynd: Klaksvíkar Ítróttafelag/Kronberg Photography)

Teir á oddaliðnum skulu eftir beinleiðis flogferðina í dag fyrireika seg til dystin, sum verður í Poznan klokkan 18 hósdagin 6. august.

Av tí at KÍ skal spæla Europa League-dyst hósdagin er næsti landskappingardystur útsettur. HB og KÍ skuldu annars spæla Summarfestival-dyst fríggjakvøldið, men ístaðin er dysturin ásettur til mánakvøldið 10. august.

KÍ er framvegis uttan skøddu Jákup Biskopstø Andreasen og Odmar Færø, meðan Hallur Hansson hevur leikbann.