Keldur: Elias Ellefsen á Skipagøtu skal til Aalborg næsta summar

Á sumri 2023 fór Elias Ellefsen á Skipagøtu til THW Kiel eftir eina ógvuliga væleydnaða tíð í svenska IK Sävehof.

Tíðin í ynskifelagnum hjá ungu føroysku stjørnuni hevur verið upp og niður: Stórir dystir í Champions League, Final 4 fyrsta árið, fleiri løtur sum stórur álopskendur profilur og millum toppskjúttarnar í Bundesliguni, men tíverri eisini skaðar, ein venjari/leikháttur sum ikki altíð hóskaði til Elias og sum heild sveiggjandi úrslit hjá liðnum.

Sáttmálin millum partarnar gongur út næsta ár, og seinastu tíðina hevur ligið í luftini, at framtíðin hjá 24-ára gamla hoyvíkinginum fer at liggja aðrastaðni.

Onnur lið í Bundesliguni, so sum Gummersbach og Rhein-Neckar Løwen, hava ligið framvið og verið møguleikar. Sum skilst hevur áhugi eisini verið úr ungarska stórfelagnum Veszprem. 

Men fyrr í kvøld skrivaði danska TV2, at Aalborg er nær við at fáa fatur á "føroyska stjørnuspælskiparanum". Hetta skal, sambært miðlinum vera enn ein "handil á hægstu hill" hjá Aalborg Håndbold og ein styrkur í royndini at vinna Champions League. Heimasíðan tv2.dk skrivar, at Aalborg skjótt kann almannakunngerða avtaluna.

Elias móti Óla og GOG sum her til Wenzel Nordic Cup? Jú, uttan so at Óli Mittún skiftir næsta summar, so bendir alt á tað (Mynd: Jens Kr. Vang=

- Ógvuliga nær við at vera uppá pláss

Portalurin hevur seinastu tíðina tosað við fleiri keldur í og kring hondbóltsheimin í Norðurevropa. Tað hevur verið óvist, hvønn veg tað fór hjá Eliasi Ellefsen á Skipagøtu, men vit hava nú eisini fingið váttað hetta:

Alt bendir á eitt skifti til Aalborg Håndbold. 

Fyrr í vikuskiftinum fingu vit upplýsingar um, at eitt sáttmálauppskot var komið úr Aalborg, og sambært okkara keldum er tað mesta nú uppá pláss.

Harvið kann Elias Ellefsen á Skipagøtu enda sum ein avloysari fyri Juri Knorr, sum eftir øllum at døma skal til PSG næsta summar.

Aalborg hevur sett seg á danskan hondbólt og hevur millum annað Niklas Landin og Thomas Arnoldssen á liðnum. Aalborg var í Final Four í Champions League í fjør og í finaluni í 2024.