Annað

-  Fór eftir at svimja mína bestu tíð men tað gekk ikki hesuferð

Signhild Joensen endaði á 44. plássi í 100 metrar rygg til HM í Suðurkoera. Hon svam eitt sekund verri enn sína tilmeldingartíð.

Signhild Joensen - her í hylinum á Gibraltar til Oyggjaleikirnar (Mynd: Sverri Egholm)

Signhild Joensen - her í hylinum á Gibraltar til Oyggjaleikirnar (Mynd: Sverri Egholm)

2019-07-22 14:08 Author image
Agnar Prestá
placeholder

Í nátt føroyska tíð svam Signhild Joensen innleiðandi kapping í 100 metrar ryggsvimjing. Hetta var fyrsta føroyska umboðanin til HM á langgeil í ár.

18-ára gamli svimjarin av Norðoyri hevði tilmeldingartíðina 1:03:01. Tá Signhild kom á mál varð greitt, at tíðin var 1:04:04. Signhild endaði nummar 44 av teimum 63, sum svumu. 16 komu í hálvfinalurnar. 

Vit fingu stutta viðmerking Signhild Joensen úr Gwangju. Hon var ikki heilt nøgd, men hon legði tað fyri dagin, sum hon megnaði: 

- Eg fór eftir at svimja mína bestu tíð, men tað gekk tíverri ikki hesaferð. Eg føldi tó, at hatta var tað besta sum eg kundi gera í dag.

Signhild hevur eina kapping eftir. Tað verður fríggjadagin í 200 metrar rygg: 

- 200 er mín sergrein, so nú havi eg nakrar dagar av venjing, og so vonandi verður tað betri tá. 

Í nátt skal Óli Mortensen royna seg í 800 metrar frí. Havnarmaðurin svimur í fyrsta heatinum og hevur tilmeldingartíðina 8:11.77. Óli fer í hylin klokkan 03.05 føroyska tíð. 

Til ber at síggja HM 2019 á FINAtv fyri eitt gjald.  


placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder