Alda Nielsdóttir
Tá OL fer av bakkastokki í japanska høvuðsstaðnum Tokyo í summar, verður tað uttan luttøku úr Norðurkorea.
Olympiska nevndin í landinum hevur tikið avgerð um ikki at senda ítróttafólk til OL í summar, tí mann ynskir at verja tey móti koronu.
Hendan avgerðin varð tikin á fundi hjá nevndini 25. mars, har Kim Il Guk, ráðharri í ítróttamálum, eisini var til staðar, skrivar Ritzau.
OL verður í Tokyo í døgunum 23. juli til 8. august. Orsakað av koronu sleppa útlendskir áskoðarar ikki inn at fylgja við kappingunum. Hesum boðaðu fyriskiparar frá í mars.
Les eisini: Útlendskir áskoðarar sleppa ikki til OL í Tokyo
Norðurkorea luttók í vetrarleikunum í Suðurkorea í 2018, og leikirnir høvdu við sær, at støðan millum londini batnaði eitt tíðarskeið.
Fyrstu ferð Norðurkorea luttók í vetrar-OL var í 1964, og fyrstu ferð landið luttók í summarleikunum var í 1972. Tilsamans hevur landið fingið 56 heiðursmerki, harav 16 gullheiðursmerki.
Boðað verður eisini frá, at Norðurkorea heldur ikki fer at luttaka í parolympisku leikunum, sum verða í døgunum 24. august til 5. september, upplýsir Altjóða Parolympiska Nevndin (IPC).
Les eisini: Osaka í undantaksstøðu: Olympiski eldurin sleppur ikki at ferðast gjøgnum býin
Vinarliga broyt tínar kennifíla - og privatlívsstillingar fyri at síggja hetta innihald