Alda Nielsdóttir
Walisiska fótbóltssambandið, FAW vil hava altjóða navnið á walisiska landsliðnum broytt.
Á walisiskum er Wales nevnt Cymru, og soleiðis vilja tey í Wales eisini verða nevnd í altjóða fótbóltskappingum.
– Liðið eigur altíð at verða umrøtt sum Cymru. Tað er tað, vit rópa tað her, sigur Noel Mooney, stjóri í FAW.
Walisiska fótbóltssambandið brúkar longu nú navnið Cymru um landsliðið á sosialu miðlunum og á heimasíðu teirra, og FAW hevur eisini samskift við evropeisku fótbóltssamgonguna, UEFA um málið.
Tá Wales luttekur í HM í Katar í vetur, verður tað undir altjóða navninum 'Wales', men síðani verður møguleikin um at broyta navnið umrøddur.
Wales hevði ikki verið fyrsta landið at broyta navnið í altjóða kappingum til heitið, sum verður brúkt á móðurmálinum í landinum. Undir lutakastinum til EM í 2024 varð Turkaland umrøtt sum ”Türkiye” og ikki sum "Turkey", sum annars hevur verið brúkt á enskum.
Noel Mooney sigur, at FAW hevur tosað við Turkaland og UEFA um, hvussu Turkaland og onnur lond hava borið seg at við at fáa navnið broytt.
Vinarliga broyt tínar kennifíla - og privatlívsstillingar fyri at síggja hetta innihald