Kappróður

90 bátsmanningar á norðoyastevnu

FM-róðurin byrjar á norðoyastevnu 3. juni.

(Savnsmynd: Jens Kr. Vang)

(Savnsmynd: Jens Kr. Vang)

2023-05-23 15:43 Author image
Sverri Egholm
placeholder

3. juni verður skjøtul settur á kappróðrarárið, og tað verður sum vant á norðoyastevnu í Klaksvík.

Gott 90 manningar hava melda til luttøku til fyrsta róðurin, og er tað nakrar fleiri enn til fyrsta róður í 2022. Størsti bólkurin er barnaróður gentur, sum aftur í ár mugu rógva innleiðandi róðrar, har 10 tær bestu rógva finalu.

Sum nakað nýtt fer FM1 at senda kappróðrarsendingar hvønn fríggjadag kl. 15-16 frá 2. juni til 27. juli. Vertur verður Petur í Gong, sum er kendur innan kappróðrarheimin. Petur fer at hava ymiskar gestir við til allar sendingarnar. 

Nakrar broytingar eru í skipanini av kappróðrum í ár og frammyvir, í mun til undanfarin ár. Stevnufyrireikarar og umboð fyri Róðrarsambandið hava fingið størri ábyrgd innan trygdina, tá kappróður verður fyriskipaður og avgreiddur.  

Fjarðastevnan, sum skuldi verða á Strondum er, vegna serligar umstøður, flutt á Skála.

FM-róðrarnir verða soleiðis:

• 3. juni norðoyastevna í Klaksvík
• 17. juni sundalagsstevna í Hósvík
• 24. juni Jóansøka á Tvøroyri
• 1. juli varmakelda í Fuglafirði
• 8. juli fjarðastevna á Skála
• 15. juli vestanstevna í Miðvági
• 28. juli Ólavsøka í Tórshavn.

Øll kort yvir róðrarøkir vera í løtuni dagført og koma á okkara heimasíðu rsf.fo í komandi viku. Har er eisini tilskilað, hvussu rógvast skal út á upphitingarøkir og startin. Rógvarar skulu gevast kortunum gætur.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder