Størsta padel-kapping higartil í Føroyum verður fríggjakvøldið

Nýggja Padelmiðstøðin á Hjalla lat upp fyri stórum mánaða síðani. Har er snøgt og nógv, høllin er nógv nýtt, og í morgin verður fyrsta stóra kappingin har.

Talan er eisini um størstu kappingina í Padeltennis í Føroyum higartil. 84 spælarar, 42 lið, hava meldað til. Og sum skilst var eisini bíðilisti til onkran bólk.

Talan er um tríggjar ymiskar bólkar: B-kappingin hjá monnum, størsti bólkurin, A-kappingin hjá monnum, kappingin á hægsta stigi, og kvinnukappingin.

Talan verður um fyrstu kappingina hjá kvinnum. Har eru tíggju spælarar. Ein av málunum við nýggju høllini var, at fáa fleiri kvinnur at spæla.

Elin Sjúrðardóttir Holm og Bára Hansen eru partur av bólkinum, sum stendur fyri nýggju høllini 

Spælt verður á hesum trimum vallunum, umframt einum afturat (Myndir: Sverri Egholm)

Myndir: Vinarpør vilja skapa betri karmar fyri padel-tennis í Føroyum

Eins og í hinum kappingunum, er tað Padel Forum, ið skipar fyri. Tað eru Arnar Lognberg, Niklas Reginsson og Heini Viðoy.

Nú er møguligt at nýta fýra vallir - búr - í mun til til tvey. Harvið verður veruligt lív í á Hjalla fríggjakvøldið.

Byrjað verður við B-bólkinum hjá monnum klokkan 17. Hinar báðar kappingarnnar standa at vera frá 20.15 til stutt eftir klokkan 23.

Møguleiki er hjá áskoðarunum at vera í millum annað "lounge-økinum" og á svalanum og hyggja. Eisini kann man keypa ymiskt.