Endaliga váttað: Hanus Sørensen til NK Celje

Sum vit skrivaðu fyrst í oktober, skal Hanus Sørensen skjótt spæla yrkisfótbólt í Slovenia - sum tann fyrsti føroyingurin nakrantíð

Sí eisini: Hanus Sørensen skiftir til slovenskan fótbólt

Hetta er í dag endaliga váttað. Meðan føroyska fótbóltslandsliðið var umborð á flogfarið ávegis til Frankfurt, legði NK Celje mynd út við kunngerð um, at felagið hevði fingið fatur á føroyska landsliðsspælaranum.

- Hann hevur royndir sum høgri bakkur, men stóð seg væl sum miðvallari hetta kappingarárið í Føroyum. Hanus Sørnsen legði upp til nógv mál (14)

Hanus Sørensen hevur verið ógvuliga eyðsýndur á HB-liðnum í 2024 og fer nú at royna seg uttanlands aftur (Savnsmynd: Sverri Egholm)

Sáttmálin millum 23-ára gamla havnarmannin og slovenska meistaraliðið kemur í gildi 1. januar 2025. Sáttmálin er galdandi til og við 30. juni 2027. 

NK Celje er í løtuni á 4. plássi í Prva Liga. Liðið er eisini í bólkaspælinum í Conference League. Føroyingurin fær spælt frá 1. januar.

Hanus Sørensen hevur ikki spæt ella vant fyri besta liðið hjá HB síðani í september. Landsliðsspælarin hevur vant við 1. deild.

Sí eisini: - Tað er einki persónligt mótvegis Hanusi

Hanus hevur áður umboðað FC Midjylland og Middelfart í donskum fótbólti. Seinastu dagarnar hevur hann verið í Slovenia til læknakanning. Í kvøld fer tekniskt sterki spælarin við landsliðsliðfeløgunum til Armenia, har landsdystur er á skránni hósdagin.

Sí eisini: Skulu ferðast meginpartin av samdøgrinum

Dagført: 16.11